Bir çox mexaniki alətlərin əksinə saatınız gündə 24 saat, ildə 365 gün çalışır. Saatın dəqiqliyini sabit saxlamaq üçün onun komponentləri yağlanmış və təmiz olmalıdır. Yağın keyfiyyəti isə öz növbəsində saatın həssaslığını, dəqiqliyini zəiflədə bilər. Buna görə də, məsələn VMF Saat Fabriki olaraq hər 4-5 ildə bir dəfə saatın Sertifikatlı Saat Servisi tərəfindən detallarının yağlanmasını və saata ümumi baxışın keçirilməsini tövsiyyə edirik. Keyfiyyət standartları ilə saatın uzun müddət çalışması üçün saatın mütəmadi baxıma ehtiyyacı var.

Bəs, gün ərzində saata qulluq etməyin hansı qaydaları var? Qeyd edək ki, saatınızın özündə əks etdirdiyi funksiyalarla sizi zamanında və xətasız təmin etmək üçün bu qaydalara əməl etmək məsləhətdir.

Gəlin, gün ərzində saatımıza edə biləcəyimiz sadə qulluq qaydaları ilə tanış olaq:

SƏHƏR : 

KOSMETİKA VƏ KİMYƏVİ MADDƏLƏR

Səhərlər saatınızı ətir və s. kimi kosmetika məhsullarından, eləcə də kimyəvi maddələrdən (məsələn, kimyəvi yuyucular) qoruyun. Kosmetika məhsulları  və kimyəvi maddələrlə təmasda olmaq saatınızın suya davamlılığını azalda və ümumilikdə saatın mexanizminə ziyan vura bilər.

EHTİYAT VAXT ENERJİSİ

Optimal dəqiqlik üçün saatınızı onun ehtiyat enerjisi sona çatmadan qurun. Özü qurulan saatı yüksək sürətlə yelləməyin, bu səmərəsiz hərəkət saatınızın mexanizmini zədələyə bilər. Əl ilə Qurulan Mexaniki Saatların isə gün ərzində qurulması məsləhətdir. Lakin bu zaman qurma düyməsi sona yaxınlaşdıqda dayanmaq lazımdır – əks təqdirdə saatın mexanizmi zədələnə bilər. Adətən qurma düyməsini 20 dəfə burmaq kifayət edir.

SAATIN TƏMİZLƏNMƏSİ

Metal və rezin qolbağlar, suya davamlı saatın korpusu yumşaq diş fırçası ilə təmizlənə bilər. Biraz sabunlu sudan istifadə etmək və daha sonra yumşaq pambıq parça ilə qurutmaq məsləhət görülür. Dəniz suyundan sonra saatınızı mütləq təmiz su ilə yaxalayın.

GÜNORTA (GÜN ƏRZİNDƏ) :

BATAREYA

Ömrü adətən 2-5 il arası olur. Bu saatın növündən və funksiyalarının sayından asılıdır. Batareyada EOL (End Of Life/Ömrünün Sonu) funksiyası vasitəsilə saniyə əqrəbi hər 4 saniyədən bir səhv göstərməyə başlayır ki, bu artıq batareyanın bitdiyini bildirir. Saatınızı qorumaq və onu uzun müddət istifadə etmək üçün batareya dəyişdirməyi Sertifikatlı Servisdə etməniz tövsiyə olunur. Qeyd edək ki, hətta məşhur İsveçrə saat Brendi olan TISSOT Şirkəti saatlarına beynəlxalq zəmanət verdiyi halda, əgər saat Sertifikatsız Servis tərəfindən açılaraq mexanizmində problemlər yaranarsa, Şirkət bunu zəmanət şərtinin pozulması kimi qəbul edir.

XARİCİ TƏSİRLƏR

Əgər saatınız şiddətli təsirə (zərbəyə, təzyiqə və s.) məruz qalaraq zədələnibsə, o mütləq sertifikatlı saat ustası tərəfindən təmir edilməlidir. Eyni zamanda saatınızı 60°C-dən yuxarı və 0°C-dən aşağı temparaturdan qoruyun. Qəfil temparatur dəyişikliyi məsləhət görülmür (günəş enerjisi ilə isindikdən dərhal sonra soyuq suya daxil olmaq (dalğıc və s.) olmaz).

SU İLƏ BAĞLI TƏDBİRLƏR

Saatlarınızda xronoqraf düymələri varsa, suda olarkən istifadə etməyin. Sizin saatınızın sudan müdafiəsi (5 və 10 bar suya davamlı) olsa da, suda olarkən bu düymələrin istifadəsi mexanizmi zədələyə bilər. Yalnız xüsusi təminatlı saatları suda olarkən istifadə etmək olar. Əgər saatınız dəri kəmərlidirsə, kəmərin tez yaşlanmaması üçün su vər tər ilə əlaqədən çəkinin.

AXŞAM :

TARİXİN QURULMASI 

Saatınızın tarixini saat 22:00-dən 02:00-dək qurmayın. Çünki bu saat ərzində tarix avtomatik olaraq sabahkı günə dəyişir. Sizin əl ilə müdaxilə etməyiniz, saatın mexanizmində zədələnmə və təqvimdən geri və ya irəli getməsi riskini artırır.

MAQNİT

Saatın bir çox komponenti metaldan hazırlandığına görə maqnit saatın fəaliyyətini müvəqqəti olaraq poza və ya hərəkəti tamamilə dayandıra bilər. Buna görə məsləhət görülür ki, saatınızı elektron cihazların üzərinə qoymayıb, eləcə də onu maksimum dərəcədə maqnitin təsirindən uzaq tutasınız (soyuducunun qapısı, səsucaldan avadanlıqlar, xanımların əl çantasının bağlama düyməsi və s.).

SAATIN YOXLATMA İNTERVALI

Qeyd edilməlidir ki, saatın su keçirməzliyi daimi deyil. Bu, zamanla xarici təsirlərdən asılı olaraq azalır. Zəmanət müddəti bitdikdən sonra saatı ildə bir dəfə yoxlatmaq tövsiyyə olunur (xüsusi ilə dəniz səyahətləri sonrasında). Sertifikatlı Servis Mərkəzində həyata keçirilən baxış zamanı saatın su keçirməzlik dərəcəsi bərpa oluna bilər.