VMF Natural Frequencies Kino İncilərimizin bərpasında yaxından iştirak edir
Azərbaycanın ilk saat fabriki olan VMF NF Kino İncilərimizin bərpasında yaxından iştirak edir. C.Cabbarlı adına “Azərbaycanfilm” Kinostudiyasının 1969-cu il istehsalı “Bir cənub şəhərində” bədii filmi rəqəmsal formatda bərpa olunub. Bərpa ilə bağlı işlər “BalANS” Milli Rəqəmsal Bərpa Studiyası tərəfindən həyata keçirilib. Filmin bərpası üçün 12 nəfərlik heyətlə birgə 15 ay vaxt sərf olunub. Filmdə bütün işartı, küy, toz və cızıqlar təmizlənib, rəng ayarlanması və stabilləşmə işi edilib. Neqativləri Moskva tərəfindən bizə verilməyən Azərbaycan film incilərinin tam bərpa edilərək xalqa çatdırılması ideyasının müəllifi, ANS Şirkətlər Qrupunun prezidenti Vahid Mustafayevdir.
Yanvarın 27-də Nizami Kino Mərkəzində baş tutan təntənəli təqdimat mərasimində ölkənin mədəniyyət və ictimaiyyət nümayəndələri iştirak edib. Rüstəm İbrahimbəyovun ssenarisi əsasında rejissor Eldar Quliyevin çəkdiyi filmdə əsas rolları Həsən Məmmədov, Eldəniz Zeynalov, Hacımurad Yegizarov, Süsən Məcidova, Almaz Əsgərova kimi dəyərli aktyor heyəti canlandırıb. Qeyd edək ki, “BalANS” studiyası bundan əvvəl Tofiq Tağızadənin 1960-cı ildə çəkdiyi “Mateo Falkone”, Ağarza Quliyevin 1964-cü ildə çəkdiyi “Ulduz”, Həsən Seyidbəylinin 1973-cü ildə quruluş verdiyi “Nəsimi" filmlərini rəqəmsal formatda bərpa edib. Azərbaycanın dəyərlərini yaşadan bu təşəbbüsdə Azərbaycanın ilk dəqiq mexanizmlər istehsal edən saat fabriki VMF Natural Frequencies də öz imzasını qoyub. Yeri gəlmişkən, sözü gedən filmə dəstək verənlər sırasında Çingiz Mustafayev adına Fond, ANS Şirkətlər Qrupu, Çingiz Əsədulla və “Santral” şirkəti də var.
Конец формы