Mən əslən Qarabağlıyam, Ağdamdanam və Qarabağdan köçkün düşəndə mənim 5 yaşım var idi, “Qarabağ Azərbaycandır!” saatlarını Azərbaycanın ilk milli saat fabriki VMF-də istehsal edəndə isə 33 yaşım. Ötən 28 il ərzində “Qarabağ Azərbaycandır” ifadəsi hər gün mənim və ailəmin dilində olub, biz bununla böyümüşük və Qarabağın Azərbaycana qayıtması, uşaqlıq arzumun reallaşması əlbəttə, gördüyüm işdə məni çox ilhamlandırdı.

VMF-in “Qələbə Vaxtı” kolleksiyasına daxil olan “Qarabağ Azərbaycandır!” saatlarının ideyası 2020-ci ilin noyabrın 10-da 44 günlük müharibənin qələbəsi xəbərini eşidəndən sonra VMF Saat Fabrikinin yaradıcı heyəti tərəfindən irəli sürülmüşdü.

VMF saat brendi Azərbaycana məxsusdur, Qarabağ Azərbaycana məxsusdur, bu layihəni işləyənlər, bu işdə əməyi keçənlər Azərbaycanlılardır! Bəli, Azərbaycanda İlk Dəqiq Mexanizmlər İstehsal edən VMF Fabrikinin əməkdaşları London, İsveçrə, Almaniya, Rusiyada təhsil alıb, lakin hamımız beynəlxaq və müasir biliklərlə qayıtmışıq Vətənə və hamıya fəxrlə deyirik ki, biz Azərbaycanlıyıq!!!

Saat həvəskarlarının bizim saatları əzbər tanımasına baxmayaraq, Xalqımız tərəfindən tanınan və qürur hissi ilə istifadə edilən bu gözəl mühəndislik və dizayn əsərlərini zəfərimizin ildönümündə biz də Azərbaycanımız üçün etdiklərimiz haqda hesabat vermək istədik. Əsasən, dövlət kanalı AzTV və İctimai TV-də “Qələbə Vaxtı” saatlarını nümayiş etdirmək üçün xarici partnyorlarımızın dəstəyi ilə beynəlxalq səviyyədə qısa videoçarx hazırlamaq qərarına gəldik. İctimai TV-də bu videoçarx nümayiş olunsa da, AzTV həmin videoçarxı nümayiş üçün təsdiqlənmədiyini bildirdi. Onu da deyim ki, qanunları bilən vətəndaşlar kimi, videoda qanlı səhnə, qətl, cinayət və zorakılıq kimi səhnələrdən istifadə etmədik, hətta qlobal sosial şəbəkələrdə də videomuzu beynəlxalq reklam standartları əsasında baxışdan keçirib, nümayiş üçün məqbul “Trusted” və “Green Line”a sahib olduq. Bu reklamı hətta Ermənistan ərazisində paylaşmağa imkan qazandıq və bundan məharətlə yararlanırıq – qoy görsünlər!!!

Biz əvvəlcə düşündük ki, yəqin anlaşılmazlıq olub, amma daha sonra AzTV rəsmi açıqlama verərək bizim videoçarxı və ümumilikdə işi “primitiv, zəif, bayağı, cizgi filmi təəssüratlı” adlandırdı. Axı həvəslə və min bir əziyyətlə, sahib olduğumuz yerli və beynəlxalq bilik sertifikatlarına əsaslanaraq başa gələn saatlarımıza qarşı bu cür münasibət yaradıcı insanlarımızı ruhdan sala bilər. Kaş bu sözlər sosial şəbəkələrdə videonu görən düşmənlərimiz tərəfindən deyilərdi, “primitiv, zəif, bayağı, cizgi filmi”... elə olsa, sevinərdik ki, onları işimizlə qıcıqlandırdıq və qısqandırdıq. Qardaşlarımızdan belə münasibət bizə sürpriz oldu.

Amma biz və bizim pərəstişkarlarımız ruhdan düşmür, 28 il bundan əvvəl işğal olunmuş və 44 günlük müharibədə Ordumuzun Şanlı Zəfəri nəticəsində azad olunmuş Vətənimizə, əziz torpaqlarımıza ayaqyalın da olsa, amma qolumuzda VMF-in “Qələbə Vaxtı” saatları ilə getməyə hazırıq - ona görə ki Qarabağ Azərbaycandır!!!